【社長的話】

─總統母語文學的網，阮來編織

董 峰 政/2000.09.21

今年(2000年)8月11日台語文界有一大盛事，着是台語文先覺吳守禮教授(92歲)佇台灣大學舉行「國臺對照活用辭典」新冊發表會，即本冊總共費盡吳教授22冬的心血佮時間才完成，改寫1932年日本學者小川尚義所編纂「臺日大辭典」的紀錄。有「台灣之子」稱呼的陳水扁總統，為卜(bhe)表示敬意，特別前往會場參加發表會。阿扁仔總統致詞指(gi-)出，母語是社會主體性佮獨立性的象徵，並且以歌德、但丁、源氏物語的語言成就作例，表示：「希望有一工，會當看著以台灣話寫作的文學作品。」

是按怎阿扁仔總統有即款的遺憾？看袂著以台灣話寫作的文學作品！

咱掀開古今中外的歷史，有一個足好見證，著(dorh)是所有的統治者攏想盡辦法卜禁止、消滅被統治者的語言，汝看當年普法戰爭了後，普魯士佔領洛林、亞爾薩斯着即時禁止上法語課，相信逐家對都德(Daudet)「最後一課」的文章印象誠深。另外對台灣來講嘛是仝(gang)款，日本人統治台灣的時，為卜推行皇民化運動，積極鼓吹「國語家庭」，用來消滅台灣各族群的母語。終戰了後(1945年)，國民黨來台灣接收政權，嘛是用仝款的步數來推行所謂的「國語」，用罰錢、掛狗牌等無所不至的手段來禁止講方言，這是一種無疼心、殘忍的做法。統治者的目的，著是卜(bhe-)消滅被統治者的文化，方便壓制佮統治。因為母語是一個族群文化的活化石，所以母語一旦消失去，一個族群着袂記得家己(dī)的根源，喪失認同佮歸屬，所謂：「母語若失聲，啥人是阿娘？」。

自古以來，對家己無信心的族群，怹(in)的讀冊人、知識份子攏會拚命去學別人的強勢語言。比如：過去羅馬的讀冊人，拚命學「希臘文」，後來才回歸家己的「拉丁文」。文藝復興時代，意大利的文人，拚世學「拉丁文」，一直到但丁用家己的母語義大利文創作「神曲」，意大利文才受着重視。英語的命運嘛是按爾(an-ni)，十四世紀以前受過教育的英國人，自認「英語」是無水準的語言，所以拚命學「法語」、「拉丁語」。明治維新進前，日本的讀冊人，並無認同家己的假名(kana)，韓國的讀冊人嘛看不起家己的「諺文」，攏用心血咧學「漢文」，按爾才會當顯示家己的地位。即款的現象佮即碼的台灣人掠準(liah-zun-)用「華文」、「英文」感覺卡有水準仝款，這攏是自卑的心態。其實一個讀冊人若無法度用家己的母語寫作，不管伊有偌懸(gŭan峘)的學歷，伊猶原是「母語的文盲」。

阮菅芒花台語文學會成立的宗旨，着是為卜建立台語文主體性，多年來一直咧(de/le)提倡「喙講父母話，手寫台灣文」的目標。為卜落實「喙舌佮筆尖合一」的理念，所以阮的會員一路行來堅持使用母語來創作，到今(daⁿ)不但有個人「母語的詩集」，而且即幾冬來連紲(sua)得着南瀛文學新人獎的榮譽，另外本學會也連續出版三期「菅芒花台語文學」佮三期的「菅芒花詩刊」。有了即六期的寫作經驗佮交流，即期阮推出感情豐沛、正宗原汁的上等料理─菅芒花詩刊革新號版，阮相信即本詩刊的誕生，會當予台灣之子─阿扁仔總統，對母語創作的期待，提早來完成。

最後向望即坵「母語的園地」，擱卡濟愛好台語文的友志，共同來掖種、沃水、雍肥，阮相信毋(m)免偌久時間，咱著(diorh)有一塊百花盛開，鳥語花香的「台語花園」，予台灣文學會當早一日出頭天，佇世界文學中參人有比並。(寫佇921大地動一周年紀念日)